. : : Omar عمر : : .

كنت لسه بادي ألملم في الحاجات والحاجات كانت كتير والزمن مكنش فيه بقى وقت يكفي أصل الحاجات كانت كتير وكل حاجة كان بيبقى فيها شئ مالذكريات ولما منهم حاجة تسقط عالبلاط يشتغل فيلم المواجع والمواجع كانت كتير زيها زي الحاجات .. شوت واحد . ورقة بيضا وفيها نقطة والنقط كانت كتير يعني بالنسبالي ذكرى زي كتير مالذكريات يمكن تكون بالنسبة ليك النقطة نقطة بس بالنسبالي ممكن تبقى حلم شوف بقى كام حلم مات شوف بقى كام ورقة ماللي فيها نقطة ضاعوا وسط الذكريات وانا .. كنت لسة بادي الملم في الحاجات والحاجات كانت كتير والنقط كانت كتير والحياة بالنسبة لية بقت يادوب حاجة من وسط الحاجات

أنا والحزن كان لازم نكون أصحاب لا يوم أنساه ولا يسيبني أنا والحزن كان لازم ... أنا صوت البكا صوتي أنا أصلاً  مبفهمش أما بتكلم ولا بفهمني في سكوتي ... كمان الحزن يشبهني يشبه كمان ضحكتي المكتومة في الآهة ويشبه الآهة اللي عاملة نفسها ضحكة  ويشبهني ... فأنا صوت البكا صوتي وأنا والحزن متلازمين بنعرف نقضي أوقاتنا كبني آدمين فنحكي لبعض حكاياتنا اللي تشبه بعض ونسمع أنين أوجاعنا مزيكا ونرفع القبعة للي بيعرف يمسح ألمه بأستيكة ونتكلم ونتساير ونضحك علينا لأننا عارفين  إن إحنا كان لازم نكون أصحاب